/ सुर्खेत, साउन १५ —
नेपाली मौलिकता, चेली–माइतीबीचको आत्मीय सम्बन्ध र तीज पर्वको सांस्कृतिक महत्वलाई केन्द्रमा राखेर निर्माण गरिएको नयाँ तीज गीत “माइतीको दैलो बरिलै” आज औपचारिक रूपमा सार्वजनिक गरिएको छ।
पछिल्ला वर्षहरूमा बढ्दो आधुनिक प्रस्तुतिका बीच परम्परागत तीजको मौलिक भाका, नेपाली लोकलय र सांस्कृतिक पहिचानलाई पुनः स्थापित गर्ने प्रयास स्वरूप यो सिर्जना ल्याइएको गीतका निर्माता भुवन खरालले जानकारी दिए।
गीतमा चेलीको माइतीप्रतिको माया, बाल्यकालका मिठा सम्झनाहरू, माइतीघरको आत्मीय वातावरण तथा परिवारका सदस्यहरूसँगको भावनात्मक सम्बन्धलाई कलात्मक ढंगले प्रस्तुत गरिएको छ।
समग्र प्रस्तुतिमा नेपालीपनको छाप
निर्माता खरालका अनुसार गीतको शब्द-चयन, भाव-अभिव्यक्ति, लोकलयमा आधारित संगीत संयोजन, मौलिक गायन शैली र परम्परागत वाद्यवादनको प्रयोगमा विशेष ध्यान दिइएको छ। त्यसैगरी, भिडियोको छायाङ्कन, सम्पादन, रङ संयोजन, निर्देशन, पहिरन, मेकअप, लोकेसन छनोट र कोरियोग्राफी लगायतका प्राविधिक एवं दृश्य पक्षमा पनि विशुद्ध नेपालीपन झल्काउने प्रयास गरिएको छ।
गीतका गीतकार भानुभक्त रिजालका अनुसार भिडियोमा ग्रामीण परिवेश, नेपाली मौलिक पहिरन, तीजका परम्परागत क्रियाकलाप र सांस्कृतिक जीवनशैलीलाई जीवन्त रूपमा उतारिएको छ।
कलाकार र प्राविधिक टोलीको सामूहिक मेहनत
गीत निर्माणमा संलग्न सम्पूर्ण सर्जक, कलाकार तथा प्राविधिक टोलीको सामूहिक मेहनत र सिर्जनात्मक समर्पणका कारण यो गीतले उत्कृष्ट रूप लिन सफल भएको निर्माण पक्षले जनाएको छ।
निर्माण टोलीले सम्पूर्ण सहयोगी, शुभचिन्तक तथा दर्शक–श्रोताप्रति आभार व्यक्त गर्दै गीत हेरेर तथा सुनेर प्रतिक्रिया दिन र सेयर गरी नेपाली मौलिक कला र संस्कृतिको संरक्षणमा साथ दिन सबैमा अनुरोध गरेको छ। साथै, आगामी दिनमा पनि नेपाली मौलिक कला, भाषा, संस्कृति र परम्परालाई जोगाउने यस्ता सिर्जनाहरू निरन्तर ल्याउने प्रतिबद्धता निर्माण पक्षले व्यक्त गरेको छ।
