काठमाडौँ।

प्रधानमन्त्री बालेन्द्र (बालेन) शाहले भोटेकोशी र त्रिशूली नदी प्रणालीमा आएको विनाशकारी बाढीबाट प्रभावित ज्येष्ठ नागरिकहरूप्रति विशेष सहानुभूति र समवेदना प्रकट गर्दै सरकार उहाँहरूको साथमा रहेको प्रतिबद्धता जनाएका छन्। 

नुवाकोटको विदुर—१० बेत्रावतीबाट ६४ वर्षीया चन्द्रिका श्रेष्ठको सकुशल उद्धार गरिएको प्रसङ्ग उल्लेख गर्दै प्रधानमन्त्री शाहले यो सफलताले सिङ्गो देशमा आशा जगाएको र खोजी तथा उद्धार कार्यमा सरकार अझै निरन्तर डटेर लागिरहेको सन्देश दिएको बताएका छन्।

बाढी प्रभावित क्षेत्रका आमाबुबाहरूलाई सम्बोधन गर्दै प्रधानमन्त्रीले भावुक शब्दहरूमा भनेका छन्, "हजुरहरूले जीवनमा अनेक घामपानी, खडेरी र आँधीबेहरी पार गर्नुभएको छ। भोटेकोशीको बाढीले हजुरहरूको ओत र जायजेथा बगाएको छ, तर हजुरहरूको स्वाभिमान, अनुभव र मार्गदर्शनको अपरिहार्यतालाई बगाउन सकेको छैन।" 

अस्थायी शिविर र स्वास्थ्य सेवाको व्यवस्था

प्रधानमन्त्री शाहका अनुसार बाढीका कारण विस्थापित भएका ज्येष्ठ नागरिकहरूका लागि अस्थायी शिविर तथा होल्डिङ सेन्टरहरूमा राहत, स्वास्थ्य सेवा र मनोसामाजिक परामर्शको व्यवस्था गरिएको छ। 

आश्रय व्यवस्थापन: बाढीबाट क्षतिग्रस्त बनेको नुवाकोटस्थित 'देवीघाट ज्येष्ठ नागरिक संरक्षण तथा अध्ययन प्रतिष्ठान'का वृद्धआश्रममा रहेका आमाबुबाहरूमध्ये ७ जनालाई काठमाडौँको 'नेपाल सिनियर केयर म्हैपी' र १७ जनालाई नुवाकोटको इनारपाटीस्थित 'कृष्णप्रणामी मन्दिर'मा अल्पकालीन आश्रय दिइएको छ।

शारीरिक तथा मानसिक सहयोग: हिँडडुलमा समस्या भएका ज्येष्ठ नागरिकहरूका लागि ह्वीलचियर तथा वाकरको प्रबन्ध मिलाइनुका साथै मानसिक आघात कम गर्न विशेष टोलीमार्फत निरन्तर स्वास्थ्य परीक्षण र मनोसामाजिक परामर्श प्रदान भइरहेको छ।

प्रधानमन्त्रीले यो अस्थायी बसाइलाई सकेसम्म छोटो बनाएर छिटोभन्दा छिटो सुरक्षित स्थायी बसोबासको प्रबन्ध मिलाउने आश्वासन समेत दिएका छन्। 

पीडितमाथि अमानवीय व्यवहार गर्नेलाई कारबाहीको चेतावनी

विपत्तिको यस कठिन घडीमा आफन्त र सर्वस्व गुमाएका नागरिकहरूको आक्रोशलाई स्वाभाविक रूपमा लिनुपर्ने बताउँदै प्रधानमन्त्रीले सुरक्षाकर्मी तथा नागरिक प्रशासनलाई संयमतापूर्वक व्यवहार गर्न निर्देशन दिएका छन्।

यसैक्रममा, पीडितहरूको पीडामाथि अनावश्यक टिप्पणी गर्ने, हियाउने वा अमानवीय व्यवहार गर्नेहरूप्रति सरकार निर्मम हुने र कडा कानुनी कारबाही गरिने चेतावनी पनि उनले दिएका छन्।

सुरक्षाकर्मीको योगदानप्रति उच्च सम्मान

आफ्नो ज्यान जोखिममा राखेर खण्डहर र दलदल बनेका क्षेत्रहरूमा खोजी तथा उद्धारमा निरन्तर खटिएका नेपाली सेना, नेपाल प्रहरी र सशस्त्र प्रहरी बलका सुरक्षाकर्मीहरूप्रति प्रधानमन्त्रीले उच्च सम्मान र कृतज्ञता व्यक्त गरेका छन्।

साथै, बाढीका कारण ज्यान गुमाउने ज्येष्ठ नागरिक तथा अन्य नागरिकहरूप्रति भावपूर्ण सामूहिक श्रद्धाञ्जली अर्पण गर्दै शोक सन्तप्त परिवारजनमा समवेदना व्यक्त गरिएको छ। 

प्रधानमन्त्री शाहले सम्पूर्ण बाढी प्रभावित आमाबुबा र नागरिकहरूलाई मन दह्रो बनाउन आग्रह गर्दै राज्य र सरकार पूर्ण रूपमा उहाँहरूकै सेवामा समर्पित रहेको दोहोर्‍याएका छन्।