वीरेन्द्रनगर, सुर्खेत ।

नेपाली कांग्रेस वीरेन्द्रनगर-३ को वडा अधिवेशनमा चरम धाँधली र एकलौटी प्रक्रिया अपनाइएको भन्दै असन्तुष्ट पक्षले समानान्तर वडा समिति घोषणा गरेको छ। कूल ४०२ जना क्रियाशील सदस्यहरूको नाम नियोजित रूपमा छुटाएर जबर्जस्ती समिति र क्षेत्रीय प्रतिनिधि चयन गरिएको दाबी गर्दै बालकृष्ण हमाल चालिसेको नेतृत्वमा नयाँ समानान्तर समिति गठन गरिएको हो।

के हो मुख्य विवाद?

अधिवेशन अगावै ४०२ जना क्रियाशील सदस्यहरूको नाम नवीकरण र नामावली सूचीबाट गायब पारिएपछि असन्तुष्ट पक्षले निर्वाचन अधिकृत तथा नेपाली कांग्रेस जिल्ला कार्यसमितिको ध्यानाकर्षण गराएका थिए।

जिल्ला नेतृत्व र निर्वाचन अधिकृतले असमझदारी सुल्झाउन प्रक्रिया रोक्ने आश्वासन दिए तापनि संस्थापन/अन्तरिम पक्षले त्यसलाई बेवास्ता गर्दै एकपक्षीय रूपमा समिति घोषणा गरेको हमालको आरोप छ। स्थानीय र निष्ठावान् कार्यकर्ताहरूलाई पाखा लगाउँदै ७० प्रतिशतभन्दा बढी जनभावना विपरीतको टिम कब्जा गरिएकाले बाध्य भएर समानान्तर समिति बनाउनुपरेको उनले बताए।

वडा सभापतिसँगै वडाध्यक्षको उम्मेदवार घोषणा

भेलामा उपस्थित करिब ४०० देखि ५०० जना सदस्यहरूको हलबाटै बालकृष्ण हमाल चालिसेलाई समानान्तर समितिको वडा सभापति चयन गरिएको छ। साथै, आगामी स्थानीय तहको निर्वाचनमा उनलाई वडा नं. ३ को वडाध्यक्षको उम्मेदवारका रूपमा अघि सार्ने निर्णय समेत सर्वसम्मत रूपमा गरिएको जनाइएको छ।