बाढीपीडितका लागि राहत संकलन गर्ने बहानामा 'प्रधानमन्त्री दैवी प्रकोप उद्धार कोष'को नाम दुरुपयोग गरी ठगी गर्न खोजेको आरोपमा रामेछापका एक युवक पक्राउ परेका छन्।
जिल्ला प्रहरी कार्यालय रामेछापका अनुसार गोकुलगंगा गाउँपालिका–२, ठोसेका ३२ वर्षीय भगवान कार्कीलाई नियन्त्रणमा लिइएको हो।
प्रहरीका अनुसार कार्कीले आर्टिफिसियल इन्टेलिजेन्स टुल ChatGPT लगायत प्रविधिको प्रयोग गरी कोषमा १ लाख २० हजार रुपैयाँ सहयोग गरेको देखाउने नक्कली बैंक स्टेटमेन्ट तथा रसिद तयार गरेका थिए। त्यसपछि उक्त फर्जी कागजातमा सरकारी खाताको विवरण हटाएर आफ्नो व्यक्तिगत QR Code राखी सामाजिक सञ्जालमार्फत सर्वसाधारणबाट रकम संकलन गर्ने प्रयास गरेको प्रारम्भिक अनुसन्धानबाट खुलेको छ।
विपद्का बेला पीडितको नाममा सहयोग गर्न चाहने दाताहरूलाई भ्रममा पारी रकम आफ्नै खातामा जम्मा गराउने नियतले यस्तो कार्य गरिएको प्रहरीको भनाइ छ। घटनाबारे थप अनुसन्धान भइरहेको जिल्ला प्रहरी कार्यालय रामेछापले जनाएको छ।
यसैबीच, प्रहरीले बाढी तथा विपद् राहत कोषमा सहयोग रकम जम्मा गर्दा सामाजिक सञ्जालमा देखिने व्यक्तिगत QR Code वा शंकास्पद स्टेटमेन्टका आधारमा पैसा नपठाउन आग्रह गरेको छ। राहत रकम पठाउँदा सम्बन्धित सरकारी निकायको आधिकारिक खाता र verified QR Code मात्र प्रयोग गर्न सर्वसाधारणलाई सचेत गराइएको छ।
