सुर्खेत, २० असार ।

दोस्रो कर्णाली प्रदेशस्तरीय आइटिएफ तेक्वान्दो प्रतियोगिताको उपाधि सुर्खेत जिल्लाले हात पारेको छ। कर्णाली प्रदेशका १० वटै जिल्लाका खेलाडीहरूले २८ वटा तौल समूहमा कडा प्रतिस्पर्धा गरेको उक्त प्रतियोगितामा १० वटा स्वर्ण पदक जित्दै सुर्खेत समग्रमा पहिलो (च्याम्पियन) बन्न सफल भएको हो। प्रतियोगितामा ७ स्वर्णसहित सल्यान दोस्रो र ४ स्वर्णसहित दैलेख तेस्रो स्थानमा रहे।

🥇 ३ महिनाको शिशु काखमा राखेर स्वर्ण पदक चुम्ने 'भूमिका'

यस प्रतियोगिताको सबैभन्दा प्रतिक्षित र प्रेरणादायी पक्ष भेरीगंगा नगरपालिकाकी २० वर्षीया खेलाडी भूमिका राजीको साहस बन्यो। आफ्नो मात्र ३ महिनाको शिशु (बच्चा) लाई काखमा लिएर प्रतियोगितास्थल पुगेकी भूमिकाले ५० केजी तौल समूहमा सानदार प्रदर्शन गर्दै स्वर्ण पदक जितेकी हुन्। पारिवारिक जिम्मेवारी र सुत्केरी अवस्थाको चुनौतीलाई पन्छाउँदै उनले मैदानमा देखाएको यो उत्साहले सबैलाई चकित बनाएको छ।

💬 "यो कर्णालीका महिलाहरूको आत्मविश्वास र समर्पण हो" – उपाध्यक्ष हमाल

प्रतियोगिताको समापन समारोहमा प्रमुख अतिथिको रूपमा पुगेका कर्णाली प्रदेश खेलकुद विकास परिषद्का उपाध्यक्ष प्रमोद हमालले भूमिकाको कडा तारिफ र प्रशंसा गरे। ३ महिनाको बच्चा बोकेर आउनु र स्वर्ण जित्नु चानचुने कुरा होइन। भूमिकाको यो ऐतिहासिक सहभागिताले कर्णालीका महिला खेलाडीहरूको खेलप्रतिको समर्पण, उत्साह र उच्च आत्मविश्वासलाई झल्काएको छ," उपाध्यक्ष हमालले भने। उनले यस्तो साहस र सफलताले कर्णालीमा आयोजना हुने आगामी १०औँ राष्ट्रिय खेलकुदमा महिला खेलाडीहरूको सहभागिता र प्रदर्शन अझै उल्लेखनीय हुने विश्वास व्यक्त गरे। साथै, पारिवारिक जिम्मेवारीका बाबजुद खेलकुदमा सक्रिय रहेका महिला खेलाडीहरूलाई राज्यका तर्फबाट थप प्रोत्साहन र विशेष नीति ल्याउन आवश्यक रहेको उनको भनाइ थियो।