दैलेख, ८ भाद्र — दैलेखको दुल्लु नगरपालिकामा प्रहरीले ठूलो परिमाणमा अवैध हातहतियार बरामद गरेको छ। दुल्लु नगरपालिका वडा नं. ०९ प्यादुरस्थित सागिना, चुल्लेसीधार, काफलकोट सामुदायिक वनको जंगलमा बेवारिसे अवस्थामा छाडिएका ४ थान एकनाले भरुवा बन्दुक फेला पारिएको हो।
जिल्ला प्रहरी कार्यालय दैलेखका अनुसार इलाका प्रहरी कार्यालय दुल्लुबाट खटिएको गस्ती टोलीले नियमित गस्ती गरी कार्यालय फर्कने क्रममा आज (भाद्र ८ गते) दिउँसो १४:३० बजेको समयमा उक्त हतियारहरू फेला पारेको हो।
सामुदायिक वनको जंगलभित्र बेवारिसे अवस्थामा राखिएका ती भरुवा बन्दुकहरूलाई प्रहरीले तुरुन्तै आफ्नो नियन्त्रणमा लिएको छ। उक्त हतियार कसले र कुन प्रयोजनका लागि जंगलमा लुकाएर राखेको हो भन्ने विषयमा थप अनुसन्धान भइरहेको जिल्ला प्रहरी कार्यालय दैलेखका सूचना अधिकारी प्रहरी निरीक्षक ऋषिकेश गौतम हरिजनले जानकारी दिएका छन्।
