गोप्य सूचनाका आधारमा खटिएको प्रहरीको संयुक्त टोलीद्वारा कालिकाटोलका ३० वर्षीय प्रकाश कँडेल नियन्त्रणमा
वीरेन्द्रनगर, सुर्खेत
सुर्खेतको वीरेन्द्रनगरबाट अवैध लागूऔषध (ब्राउन सुगर)सहित एक जना पक्राउ परेका छन्। वीरेन्द्रनगर नगरपालिका–५, कालिकाटोलस्थित आफ्नै कोठाबाट ३० वर्षीय प्रकाश कँडेल १० ग्राम ६५० मिलिग्राम ब्राउन सुगरसहित पक्राउ परेका हुन्।
विशेष गोप्य सूचनाका आधारमा जिल्ला प्रहरी कार्यालय सुर्खेत र लागू औषध नियन्त्रण ब्यूरो शाखा कार्यालय सुर्खेतको संयुक्त प्रहरी टोलीले आइतबार (साउन १७ गते) बिहान ११:५५ बजे कँडेलको कोठामा छापा मारेको थियो।
जिल्ला प्रहरी कार्यालय सुर्खेतका अनुसार प्रहरी नायब निरीक्षक (प्र.ना.नि.) विष्णु बहादुर बुढा र लागू औषध नियन्त्रण ब्यूरोका प्रहरी वरिष्ठ हवल्दार (प्र.ब.ह.) गगन बहादुर नेपालीको कमाण्डमा खटिएको टोलीले कँडेलको कोठाबाट १ पोका र ९ पुडिया गरी शुद्ध तौल १० ग्राम ६५० मिलिग्राम ब्राउन सुगरजस्तो देखिने खैरो धुलो पदार्थ बरामद गरेको हो।
ब्राउन सुगरसहित नियन्त्रणमा लिइएका कँडेललाई हाल जिल्ला प्रहरी कार्यालय सुर्खेतको हिरासतमा राखेर लागूऔषध नियन्त्रण ऐनअनुसार थप अनुसन्धान प्रक्रिया अगाडि बढाइएको प्रहरीले जनाएको छ।
