बीरेन्द्रनगर, सुर्खेत।
सुर्खेतको बीरेन्द्रनगर नगरपालिका–९ स्थित पिपलडाँडामा मोटरसाइकल दुर्घटनामा परी गम्भीर घाइते भएका एक युवकको उपचारका क्रममा मृत्यु भएको छ।
गएराति (भाद्र १९ गते) करिब ११:०० बजेको समयमा लाटिकोईली चोकबाट मंगलगढी चोकतर्फ आउँदै गरेको कर्णाली प्रदेश ०२००२ प १३९९ नम्बरको मोटरसाइकल आफैँ अनियन्त्रित भई सडकको डिभाइडरमा ठोक्किएको थियो।
दुर्घटनामा परी दैलेख/सुर्खेत जोड्ने सडक खण्ड नजिक बराहताल गाउँपालिका–४ तरङ्गा स्थायी घर भएका १९ वर्षीय जिवन बहादुर शाही गम्भीर घाइते भएका थिए। दुर्घटनालगत्तै नगर प्रहरी कार्यालय सुर्खेतबाट प्रहरी नायब निरीक्षक (प्रनानि) सिउ कुमार चौधरीको कमाण्डमा ट्राफिकसहित ७ जनाको टोली घट्नास्थल पुगेर घाइतेलाई उद्धार गरी कर्णाली प्रदेश अस्पताल कालागाउँ पुर्याएको थियो।
टाउको र शरीरका विभिन्न भागमा गम्भीर चोट लागेका शाहीको अवस्था चिन्ताजनक भएपछि थप उपचारका लागि भेरी अस्पताल नेपालगञ्ज रिफर गरिएको थियो। त्यहाँबाट उनलाई गएराति ३:०० बजे न्यूरो अस्पताल नेपालगञ्ज पुर्याइएको भए पनि उपचार सम्भव नभएपछि पुनः सुर्खेत ल्याइएको थियो।
कर्णाली प्रदेश अस्पताल कालागाउँमा उपचारकै क्रममा आज (भाद्र २० गते) दिउँसो १२:०० बजे उनको मृत्यु भएको प्रहरीले जनाएको छ। मृतकको शव हाल सोही अस्पतालको शवगृहमा राखिएको छ।
दुर्घटनामा परेको मोटरसाइकल प्रहरी नियन्त्रणमा रहेको छ भने घटनाबारे थप अनुसन्धान भइरहेको छ।
