सुर्खेत । सुर्खेतको वीरेन्द्रनगरमा मुख्य कार्यालय रहेको वीरेन्द्रनगर बचत तथा ऋण सहकारी संस्था लिमिटेडले राष्ट्रिय सहकारी नियमन प्राधिकरणबाट सञ्चालन इजाजतपत्र प्राप्त गरेको छ। यससँगै वीरेन्द्रनगर साकोस कर्णाली प्रदेशकै पहिलो सञ्चालन इजाजतपत्र प्राप्त गर्ने सहकारी बनेको छ।

प्राधिकरणले आज पौष ३ गते संस्थालाई औपचारिक रूपमा इजाजतपत्र प्रदान गरेको हो। संस्थाले इजाजतपत्र नम्बर २०५८–००००७ प्राप्त गरेको छ। राष्ट्रिय सहकारी नियमन प्राधिकरणले मंसिर १० गते ‘सहकारी दर्ता पोर्टल’ सार्वजनिक गर्दै बचत तथा ऋणको मुख्य कारोबार गर्ने सहकारीहरूका लागि सञ्चालन इजाजतपत्र आवेदन खुला गरेको थियो।

सुर्खेत जिल्लाभर कार्यक्षेत्र रहेको यो सहकारी संस्था २०५८ साल असार २२ गते २७ जना सदस्यबाट स्थापना गरिएको हो। हाल संस्थामा २३ हजार ७८७ जना सदस्य आवद्ध छन्। संस्थामा १९ वटा संस्थागत सदस्य रहेका छन् भने ४ हजार ४१८ जना बाल सदस्य पनि आवद्ध छन्।

२०८२ मंसिर मसान्तसम्मको वित्तीय विवरण अनुसार संस्थाको

• सेयर पुँजी : १६ करोड १ लाख रुपैयाँ

• जगेडा कोष : ६ करोड ४८ लाख रुपैयाँ

• कुल संस्थागत पुँजी : ६ करोड ७९ लाख रुपैयाँ

• कुल बचत : ९९ करोड ८९ लाख रुपैयाँ

• कर्जा लगानी : १ अर्ब १० करोड रुपैयाँ

• कुल सम्पत्ति : १ अर्ब ४२ करोड रुपैयाँ रहेको छ।

सहकारीले नियामक निकायको मापदण्ड पूरा गर्दै सञ्चालन इजाजतपत्र प्राप्त गरेसँगै कर्णाली प्रदेशमा सहकारी क्षेत्रमा विश्वास र पारदर्शिता थप मजबुत हुने अपेक्षा गरिएको छ।