बाँके जिल्लाको कोहलपुर नगरपालिका-१५, अक्कलघरवामा शनिबार बिहान भएको सडक दुर्घटनामा परी एक महिलाको मृत्यु भएको छ भने मोटरसाइकल चालक गम्भीर घाइते भएका छन्।

शनिबार बिहान करिब १० बजे अक्कलघरवाको भित्री सडकमा टिप्परले मोटरसाइकललाई ठक्कर दिँदा जाजरकोट छेडागाड नगरपालिका-५ की ५७ वर्षीया देवीसरा रावतको घटनास्थलमै मृत्यु भएको जिल्ला प्रहरी कार्यालय बाँकेले जनाएको छ।

दुर्घटनाको विवरण

प्रहरीका अनुसार गुरुवा गाउँबाट हवलदारपुरतर्फ जाँदै गरेको कर्णाली प्रदेश ०२–००१ ब ०३६१ नम्बरको मोटरसाइकल र हवलदारपुरबाट गुरुवागाउँतर्फ आउँदै गरेको भे १ ख ३२३२ नम्बरको टिप्पर एक-आपसमा ठोक्किएका थिए।

मोटरसाइकलमा आमालाई पछाडि राखेर गइरहेका सुदिप रावत गम्भीर घाइते हुनुभएको छ। उहाँको छाती र टाउकोमा गम्भीर चोट लागेको छ। हाल उहाँको नेपालगन्जस्थित सन्जिवनी अस्पतालमा उपचार भइरहेको प्रहरीले जनाएको छ।

टिप्पर चालक नियन्त्रणमा

दुर्घटनापछि फरार भएका टिप्परका चालक बाँके राप्ती सोनारी-९ निवासी टेकबहादुर विष्टलाई प्रहरीले पक्राउ गरेको छ। जिल्ला प्रहरी कार्यालय बाँकेका प्रवक्ता एवं प्रहरी नायब उपरीक्षक दीपक पातलीले चालकलाई नियन्त्रणमा लिई आवश्यक कानुनी कारबाही र थप अनुसन्धान सुरु गरिएको जानकारी दिनुभयो।